नेपाली कांग्रेसको १४औं महाधिवेशन अन्तर्गत आज नेतृत्व चयन गर्नका लागि मतदान हुँदै छ।
कांग्रेस केन्द्रीय निर्वाचन समितिका अनुसार आज बिहान ८ बजेदेखि मतदान हुनेछ। मतदानका लागि काठमाडौंको भृकुटीमण्डप, राष्ट्रिय सभा गृह र नेपाल पुलिस क्लबमा व्यवस्था गरिएको छ। तीन वटा मतदान केन्द्रमा १ हजार १ सय बुथको व्यवस्था गरिएको छ।
कांग्रेसमा १३ जना पदाधिकारीसहित १३४ सदस्यीय केन्द्रीय कार्यसमिति चयन हुनेछ। जसका लागि ४९१ जना उम्मेदवार मैदानमा छन्।
प्रदेश २ बाट दुई जना केन्द्रीय सदस्य निर्विरोध निर्वाचित भइसकेका छन्। अब १३२ पदका लागि ४८९ उम्मेदवारबीच प्रतिस्पर्धामा छ।
सभापतिमा शेरबहादुर देउवा, विमलेन्द्र निधि, प्रकाशमान सिंह, डा. शेखर कोइराला र कल्याण गुरुङको उम्मेदवार छन्। त्यस्तै, दुई जना उपसभापतिका लागि विजयकुमार गच्छादार, पूर्णबहादुर खड्का, महेश आचार्य, सुजाता कोइराला, चन्द्र भण्डारी, धनराज गुरुङ र दिव्यश्वरी शाह उम्मेदवार छन्।
दुई महामन्त्रीका लागि ६ जना उम्मेदवार बनेका छन्। जसमा विश्वप्रकाश शर्मा, गगनकुमार थापा, प्रदीप पौडेल, प्रकाशशरण महत, मीनेन्द्र रिजाल र राजाराम कार्की प्रतिस्पर्धामा छन्।
कांग्रेसमा आठ वटा सहमहामन्त्रीका लागि चुनाव हुन लागेको छ। जसमा महिलातर्फ कमला पन्त र महालक्ष्मी उपाध्याय ‘डिना’, दलिततर्फ गंगा सुनार, जीवन परियार र मानबहादुर विश्वकर्मा, आदिवासी जनजातीतर्फ विकास लामा र भीष्म आङ्देम्बे, खस आर्यतर्फ किशोर राठौर र देवराज चालिसे, मधेशीतर्फ महेन्द्र यादव, रञ्जित कर्ण र रामकृष्ण यादव, मुस्लिमतर्फ परमुल्लाह मंसुर र शेख वकिल, थारुतर्फ उमाकान्त चौधरी र तेजुलाल चौधरी तथा पीछडिएको क्षेत्रतर्फ चेतराज बजाज, जीवनबहादुर शाही र बद्री पाण्डे उम्मेदवार छन्।
प्रतिकृया दिनुहोस