काठमाडौं : नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले आफ्नो पार्टीप्रति देशैभर आकर्षण बढेको बताएका छन्।
महोत्तरीको रामगोपालपुरमा बुधबार बिहान आयोजित कार्यक्रममा उनले पार्टीको एजेण्डा र आफूनेतृत्वको सरकारले गरेका कामका कारण आकर्षण बढेको तर्क गरे। ‘पहिचानका पक्षमा लड्ने पार्टीको रूपमा माओवादी केन्द्र स्थापित भएकै छ, थप सुशासन, सामाजिक न्याय र समृद्धिका लागि अघि सारेको सुस्पष्ट एजेण्डाका कारण अहिले देशैभर फेरि एकपटक माओवादी केन्द्रप्रति आकर्षणको लहर पैदा भएको छ,’ उनले भन।’
राजनीतिक हिसाबले अहिले मुलुक माओवादीकै एजेण्डामा चलिरहेको र आफ्नो पार्टी सरकारमा जाँदा हरेकपटक नयाँ काम गरेकाले अरु पार्टीभन्दा माओवादी केन्द्र नै अब्बल रहेको उनले दाबी गरे।
मध्यपहाडी लोकमार्गको थालनीदेखि लोडसेडिङमुक्त नेपाल, गाउँगाउँमा सूचना सञ्चारको विकास हुँदै सुशासन र सामाजिक न्यायका पक्षमा चालेका कदम ऐतिहासिक रहेको उनले बताए। भ्रष्टाचारका फाइल खोलेर कारबाही प्रक्रिया थाल्नेदेखि टरब्याजको समस्या समाधान र लाखौँ नागरिकताविहीन युवालाई नागरिकताका लागि कानूनी व्यवस्थालगायतका काम ऐतिहासिक उपलब्धि भएको उनको भनाइ छ।
कार्यक्रममा उनले विभिन्न पार्टी परित्याग गरी माओवादी केन्द्रमा प्रवेश गर्ने नेता कार्यकर्तालाई स्वागत गरेका थिए।
प्रतिकृया दिनुहोस