कैलालीको मोहन्याल गाउँपालिका वडा नम्बर ३ का वडाध्यक्ष गिरीको निधन

कैलालीको मोहन्याल गाउँपालिका वडा नम्बर ३ का वडाध्यक्ष नन्दाराम गिरी ‘नवीन’ को निधन भएको छ । शुक्रबार साँझ जिल्लाको बर्दगोरियास्थित दोदोधरा अस्पतालमा उहाँको निधन भएको हो ।

मुखको क्यान्सरबाट पीडित ४१ वर्षीय गिरीले लामो नेपाल र भारतका विभिन्न अस्पतालमा उपचार गराउनुभएको थियो । अन्तिम पटक काठमाडौंमा उपचार गराएर घरमै आराम गरिरहनु भएका गिरी बिहीबार अस्पताल भर्ना हुनु भएको थियो ।

वि.सं २०७४ र २०७९ सालमा भएका दुईवटै स्थानीय तहको निर्वाचनमा गिरी नेपाली कांग्रेरसबाट वडाध्यक्षमा निर्वाचित हुनुभएको थियो । स्वर्गीय गिरीको अन्तिम संस्कार दशनामी परम्परा अनुसार आजै उहाँको गाउँ फलेविसौना हुने मोहन्याल गाउँ कार्यपालिका सदस्य तथा गिरीका छिमेकी नानी दमाईले जानकारी दिनुभयो । गिरीका दुई छोरा एक छोरी हुनुहुन्छ ।