सहमति नपाउँदा महाकाली नदीमा बनेन झोलुङ्गे पुल

 महाकाली नदीमा झोलुङ्गे पुल निर्माण गर्न भारत सरकारको सहमतिका लागि स्थानीयवासी ११ पटक परराष्ट्र मन्त्रालय पुगेका छन् तर पनि सहमति प्राप्त हुन सकेको छैन । आठ वर्षअघि नै झोलुङ्गे पुलको विस्तृत अध्ययन प्रतिवेदन तयार भए पनि भारतको सहमतिका लागि पहल नहुँदा पञ्चेश्वरस्थित महाकाली नदीमा पुल बन्न नसकेको हो ।  

पञ्चेश्वर गाउँपालिका–१, रोलघाटस्थित महाकाली नदीमा पुल नहुँदा नेपाल–भारत दुई देशका नागरिक जोखिम मोलेर डुङ्गा तर्दै आइरहेका छन् । नदीमा डुङ्गा पल्टिँदा दर्जनौँले ज्यान गुमाइसकेका छन् । गाउँपालिकाका अध्यक्ष गोरखबहादुर चन्दले हरेक निर्वाचनका बेला महाकाली नदीमाथि झोलुङ्गे पुल बनाउँछौँ भन्ने वाचा गरेर चुनाव जिते पनि मतदाताको माग पूरा गर्न नसकिएको बताउनुभयो । करिब डेढ करोड रुपियाँ लागतमा बन्ने भनिएको पुलको लम्बाइ १५५ मिटर लामो हुने छ । भारतको सहमति प्राप्त हुन सके गाउँपालिकाकै लगानीमा पुल बनाउन सकिने पालिका अध्यक्ष चन्दले बताउनुभयो । 

पुलका लागि वाम गठबन्धनको सरकारका पालामा तत्कालीन परराष्ट्रमन्त्री प्रदीप ज्ञवालीले स्थलगत निरीक्षण गरेर भारतको सहमतिका लागि पहल गर्ने आश्वासन दिनुभएको थियो । त्यसयता पुल निर्माणको सहमतिका लागि स्थानीयवासी ११ पटक सङ्घीय मामिला र परराष्ट्र मन्त्रालय पुगिसकेका छन् । पुल निर्माणको सहमतिका लागि कुनै पहल नभएको पञ्चेश्वर गाउँपालिकाका अध्यक्ष चन्दले गुनासो गर्नुभयो । उहाँले भन्नुभयो, “पञ्चेश्वर बहुउद्देश्यीय परियोजना स्थलभन्दा पाँच सय मिटर तल पुल बनाउने स्टिमेट तयार गरेका छौँ ।”

पुलको दायाँ भाग भारततर्फ र बायाँ नेपालतर्फ बन्ने भएकाले भारतको सहमति आवश्यक परेको छ । स्थानीय तह, प्रदेश र सङ्घीय निर्वाचनमा सबैले पुल बनाउने वाचा गरेर पञ्चेश्वरवासीसँग मत मागिसक्नुभएको छ । अब झोलुङ्गे पुल बनेन भने अर्को पटक कसैले पनि भोट माग्न सक्ने अवस्था नभएको स्थानीय जनप्रतिनिधि बताउँछन् । 

महाकाली नदीमा पुल नहुँदा स्थानीयवासी डुङ्गा र ट्युबका माध्यमबाट जोखिम मोलेर नदी तर्दै आइरहेका छन् । नेपाल–भारत वारिपारि रोटीबेटीको सम्बन्ध छ । योबाहेक देवीदेवताको पूजापाठ पनि संयुक्त रूपमा हुने गरेको छ । पञ्चेश्वरमा रहेको प्रसिद्ध देउताल र गणमेश्वर मन्दिरको दर्शनका लागि भारतबाट हजारौँ तीर्थयात्री डुङ्गा चढेर नेपाल आउने गर्छन् ।