सुदूरपश्चिम सरकारले सार्वजनिक गरेको बजेट अपाङ्गमैत्री नभएको भन्दै विगत १० दिनदेखि आन्दोलनरत अपाङ्गता भएकाले प्रदेश सरकारको प्रतिबद्धतापछि आन्दोलन रोकेका छन् । प्रदेश सरकारका सामाजिक विकासमन्त्री झपटबहादुर साउदले बजेट अपाङ्गतामैत्री बनाउने प्रतिबद्धता वयक्त गरेसँगै आन्दोलन रोकेका हुन् । अनसनबाट सुरु भएको सडक आन्दोलन रोकिएको हो ।
अपाङ्ग्ता भएकाहरूको हक अधिकार र सम्मानित जीवनयापनका लागि उठाइएका मागलाई मन्त्री साउदले तत्कालै बजेटबाट सम्बोधन गर्न सकिने, नीतिगत रूपमा सुधार गर्नुपर्ने र अन्तरमन्त्रालय वा निकायसँग समन्वय गर्ने र बाँकी विषयमा थप छलफल गर्ने प्रतिबद्धता जनाएपछि आन्दोलन रोकिएको हो ।
घाइते अपाङ्गताका सवालमा आफू जहिले पनि सकारात्मक रहेको र सकारात्मक सोचले छलफलबाट सहमति खोजे परिणाम पनि सकारात्मक आउने उल्लेख गर्दै मन्त्री साउदले प्रदेश सरकारले आगामी दिनमा समाजका सबै वर्गसँग सहकार्य गर्ने प्रतिबद्धता जनाएका छन् ।
राष्ट्रिय अपाङ्ग महासंघ सङ्घीय प्रतिनिधि र सरकारको वार्ता टोलीबिच पहिलो चरणको वार्ता सम्पन्न भएको अपाङ्ग महासंघ सुदूरपश्चिम प्रदेश अध्यक्ष मानबहादुर साउदले बताए। अपाङ्गता अधिकार प्रवर्धन सङ्घर्ष समितिको वार्ता टोलीले सरकारी वार्ता टोलीसमक्ष राखेका २१ बुँदे मागबारे दफाबार छलफल गरेर अगाडि बढ्ने सहमति भएको जानकारी पनि उनले जानकारी दिए ।
यसअघि अपाङ्गता भएकाहरूको आन्दोलनले मुख्यमन्त्री तथा मन्त्रीपरिषद् कार्यालय, कैलाली जिल्ला प्रशासन कार्यालय, सामाजिक विकास मन्त्रालय, प्रदेशको धनगढीस्थित सहरी विकास कार्यालयमा बनाइएका र्याम्प अपाङ्गतामैत्री नभएको भन्दै तोडफोड गरेर भत्काएको थियो ।
प्रतिकृया दिनुहोस