महाशिवरात्रि पर्व आज भगवान शिवजीको उपासना गरी मनाइँदैछ ।
पवित्र पाशुपत क्षेत्रस्थित पशुपतिनाथ मन्दिर देखि देशभरका शिव मन्दिरमा आज विहानैदेखी भक्तजनको भीड लागेको छ। महाशिवरात्री आराध्यदेव भगवान महादेव अर्थात् शिवजीको उपासना गरिने हिन्दूहरुको मुख्य चाड हो ।
देशभरका शिवालयहरुमा हर्षोलासका साथ भगवान शिवको पूजा आराधना गरी यो पर्व मनाइँदैछ। शिवरात्री भगवान शिवजी उत्पत्ति हुनुभएको रातका नामबाट नामकरण भएको मानिन्छ ।
हिन्दूधर्ममा कालरात्रि, मोहरात्रि, सुखरात्रि र शिवरात्रि नामक चार प्रमुख रात्रिहरुको विशेष महत्व रहेको छ। यिनै चार रात्री मध्ये शिवरात्री एक पवित्र पर्वका रूपमा रहेको छ ।
फागुन कृष्ण चतुर्दशीका दिन प्रत्येक वर्ष यो पर्व मनाइने गरिन्छ । सम्पूर्ण दीन दुःखी र कष्टपूर्ण अवस्थामा रहेका प्राणीहरूको हृदयमा धर्मको उदय गराउने भगवान शिवको प्रिय दिनका रूपमा पनि यस पर्वलाई लिइने गरिन्छ ।
व्रत उत्सवमध्ये सर्वोत्तम कहलिएको महाशिवरात्रिका दिन भक्तजनहरूले शुद्ध भई शिव मन्दिरमा पूजा(अर्चना गरी व्रत बस्ने र भगवान शिवको प्रिय वस्तु दूध, धतुरो र बेलपत्र चढाउने गर्छन् ।
यस पर्वका दिन उपवास गरी ” ऊँ नमः शिवाय” मन्त्र जप्ने गरेमा सर्वसिद्धि लाभ भई यमलोक जानु नपर्ने धार्मिक विश्वास रहेको छ । ब्रह्माले रूद्ररूपी शिवजीलाई उत्पन्न गरेको दिन र शिव पार्वतीको विवाह भएको दिनका रुपमा शिवरात्रि पर्व मनाइन्छ। निर्जल व्रत, रात्रि जागरण, चार प्रहरको पूजा, शिवलिंगमा दुग्धाभिषेक र शिव महिमा कीर्तन शिवरात्रिको पूजा अर्चनाका मुख्य अङ्ग मानिन्छन् ।
शिवरात्रि पर्वलाई पर्वको राजा भनिन्छ र शिवरात्रिको पालनाले भोग र मोक्ष दुवैको प्रप्ति हुन्छ भन्ने धार्मिक विश्वास छ ।
प्रतिकृया दिनुहोस