बैतडी : जयपृथ्वी राजमार्गअन्तर्गत बैतडीको सुर्नया गाउँपालिका-७ भञ्ज्याङमा इलेक्ट्रोनिक भ्यान दुर्घटना हुँदा १० जना घाइते भएका छन्।
धनगढीबाट पुर्चौडीहाट जाँदै गरेको सु प प्र ०२ ००१ ज ६२० नम्बरको भ्यान दिउँसो ३ बजे दुर्घटनामा परेको बैतडीका प्रहरी प्रवक्ता, प्रहरी निरीक्षक बलदेव बडूले जानकारी दिए। दुर्घटनामा परेर घाइते हुनेहरू सबै बैतडीको पुर्चौडी नगरपालिकाभित्रका रहेका छन्।
घाइते हुनेहरूमा पुर्चौडी-५ का १५ वर्षीय भुवन साउद, २८ वर्षीया यशोदा भट्ट, ५ वर्षीय कोविट पन्त, २८ वर्षीया पवित्रा पन्त, पुर्चौडी-४ का १९ वर्षीया कमला धानुक, २२ वर्षीय प्रकाश धानुक, ५ वर्षीय नरेश बोहरा, २८ वर्षीया वसन्ती अवस्थी,१७ वर्षीय विक्रम साउद र २२ वर्षीया सावित्री धामी रहेका छन्।
घाइतेमध्ये भुवन, यशोदा, पवित्रा र कमलाको अवस्था गम्भीर छ। घाइते सबैलाई उपचारका लागि डडेल्धुरा अस्पताल लगिएको छ।
१८ यात्रु सवार भ्यानका अन्य आठजनाको अवस्था सामान्य रहेको छ।
भ्यानका चालक पुर्चौडीका महेश बोहरा फरार रहेका छन्। दुर्घटनाग्रस्त भ्यान सडकबाट करिब ५० मिटर तल खसेको छ।
घटनाबारे थप अनुसन्धान भइरहेको जिल्ला प्रहरी कार्यालय बैतडीले जनाएको छ।
प्रतिकृया दिनुहोस