एमाले मकवानपुर अध्यक्ष नै महाधिवेशन प्रतिनिधिमा पराजित

मकवानपुर — नेकपा एमाले केन्द्रीय महाधिवेशन प्रतिनिधि छनोटका लागि भएको मतदानमा मकवानपुर जिल्ला अध्यक्ष श्रीधर पोखरेल नै पराजित भएका छन् ।

हाल स्वास्थ्य उपचारका लागि काठमाडौंमा रहेका पोखरेल ११ औं महाधिवेशनको केन्द्रीय प्रतिनिधिका लागि मकवानपुर प्रतिनिधिसभा क्षेत्र नम्बर–१ तर्फबाट खुला सदस्यमा उम्मेदवार बनेका थिए । ३३४ मत प्राप्त गरे पनि उनी प्रतिनिधि छनोट हुन असफल भए । यसै समूहतर्फ पूर्वराष्ट्रिय सभा सदस्य रामचन्द्र राई पनि प्रतिनिधि छनोट भएनन् । उनले ३०२ मत प्राप्त गरे । पराजित मकवानपुर अध्यक्ष पोखरेल एमाले वरिष्ठ उपाध्यक्ष ईश्वर पोखरेल निकट मानिन्छन् ।

यस क्षेत्रबाट युवातर्फ बोलबहादुर कार्की, खुलातर्फ नवीन सिग्देल, सुनिल मोक्तान फुर्बा दोर्जे लामा र अणराज जर्गा मगर (खुल्ला) महिलातर्फ आरती पाठक, सीता विष्ट र विनाकुमारी थिङ छनोट भएका थिए । यस क्षेत्रबाट खुलातर्फ १७ जना उम्मेदवार रहेका थिए ।

मकवानपुरबाट महाधिवेशनका लागि १७ जना प्रतिनिधि छनोट हुनुपर्नेमा ८३ जनाको उम्मेदवारी परेको थियो । प्रतिनिधिसभा क्षेत्र नम्बर–२ तर्फ भने सहमतिमा प्रतिनिधि छनोट गरिएको छ । प्रतिनिधि छनोटका लागि क्षेत्र नम्बर–१ बाट ४ हजार १०९ जना, क्षेत्र नम्बर–२ बाट ४ हजार २६४ जना र दलित क्षेत्रबाट २६२ जना मतदाता रहेको एमाले मकवानपुरले जनाएको छ ।

एमाले महाधिवेशन मंसिर २७ गतेदेखि २९ गतेसम्म काठमाडौंमा हुँदै छ ।