बिना अनुमति सञ्चालन भएको पुस्तक पसललाई ५० हजार जरिवाना

नेपालगन्जमा अनुमति प्राप्त बिना सञ्चालनमा आएको एउटा पुस्तक पसललाई कारबाही गरिएको छ । कारबाही स्वरूप उक्त पसललाई ५० हजार रुपियाँ जरिवाना गरिएको छ ।

 प्रशासन कार्यालयमा दिएको सूचनाका आधारमा अनुगमनमा जाँदा नेपालगन्ज उपमहानगरपालिका वडा नं. २ बसपार्क रोडस्थित गौतम बुक्स सप्लायर्सले अनुमित बिना नै पसल सञ्चालन गरेको पाइएकाले कारबाही स्वरूप ५० हजार रुपियाँ जरिवाना गरिएको जिल्ला प्रशासन कार्यालय बाँकेका प्रमुख जिल्ला अधिकारी श्रवणकुमार पोखरेलले  बताउनुभयो ।

पसलले अनुमति नै प्राप्त नगरी सरकारी पाठ्यपुस्तक बिक्री वितरण गरेको पाइएकाले कारबाही स्वरूप उक्त रकम जरिवाना गरिएको प्रजिअ पोखरेलले जानकारी दिनुभयो ।निर्धारित सर्त पूरा गरेर सूचिकृत बिक्रेताका रूपमा अनुमति पाएका बिक्रेताहरूले मात्र सरकारी पाठ्यपुस्तक बिक्री वितरण गर्न पाउने पोखरेलले बताउनुभयो ।