जय ट्रफीः हार टार्न मधेस र बाग्मतीको संघर्ष, आर्मी र पुलिस जितको खोजीमा

काठमाडौं । जय ट्रफी एलिट कप अन्तरगत आज दोस्रो दिनको खेलमा दुई विभागीय र दुई प्रदेश टिमहरु भिड्दैछन् । विभागीय टिमहरु जितको खोजीमा छन् भने प्रदेश टीमहरु हार टार्ने प्रयासमा ।

जनकपुरको राम जानकी बहुउद्देश्यिक रंगशालामा त्रिभुवन आर्मी क्लव र बाग्मती प्रदेशको खेल जारी छ । बाग्मतीले २०० रनमा ९ विकेट गुमाउँदा इनिङ समाप्तीको घोषणा गर्यो । जबकि आर्मीभन्दा बाग्मती ७६ रनले पछाडि नै थियो ।

बाग्मतीका नन्दन यादवले अर्धसतक बनाउँदै टिमलाई धराशयी बन्नबाट जोगाएका थिए । छैटौं नम्बरमा ब्याटिङ गरेका नन्दनले ८० बलमा ५१ रन जोडे । विपिन आचार्य २०, कप्तान सन्दीप लामिछाने १० र प्रतिश जिसी ११ रन बनाएर आउट भएका थिए ।

त्रिभुवन आर्मीका आकाश चन्दले सर्वाधिक ३ विकेट लिए । यस्तै, सोमपाल कामी, सहाब आलम र पवन कार्कीले २–२ विकेट बाँडे ।
आर्मीले दोस्रो इनिङको ब्याटिङ सुरु गरेको छ । लन्च टाइमसम्म आर्मीले कुनै विकेट नगुमाइ २८ रन जोडेको छ । आर्मीका इमरान सेखले ४ रन र त्रितराज दासले १८ रन बनाएर खेलिरहेका छन् । १०५ रनको अग्रता लिइसकेको आर्मीले जितका लागि आजै बाग्मतीलाई दोस्रो इनिङको ब्याटिङमा डाकेर अलआउट पार्नुपर्छ ।

अर्को खेलमा मधेस प्रदेशविरुद्ध नेपाल पुलिस क्लव हावी भइरहेको छ । पुलिसले ४ विकेट क्षतिमा २५८ रन बनाउँदा इनिङ समाप्तिको घोषणा गर्यो । अहिले मधेसले दोस्रो इनिङमा ब्याटिङ गरिरहेको छ । पुलिसले पहिलो इनिङमा ११९ रनको अग्रता लिएको थियो । त्यसैले अब मधेसलाई सस्तैमा अलआउट गरेर जित निकाल्ने ध्याउन्नमा पुलिस टिम छ ।

अहिले मधेसका ओपनर मयन यादव र सुशील पटेल क्रिजमा छन् । मधेसको इनिङ धेरै हदसम्म मयनमा निर्भर रहने देखिन्छ । हार टार्नका लागि उनले लामो इनिङ खेल्नुपर्ने छ ।