नगरपालिकाको राजस्व मेयरको पेट्रोल पम्पमा

कैलाली, ५ भदौ - कैलालीको गौरीगंगा नगरपालिकामा नगरप्रमुख देवीदत्त कँडेलले ठेकेदारसँग मिलेमतो गरी नगरपालिकाको राजस्व आफ्नै निजी पेट्रोल पम्पको खातामा जम्मा गराएको खुलासा भएको छ । 

पालिकाको वडा नं. ४ मा रहेको जोगनिया तालको ठेक्काबाट संकलन हुनुपर्ने पाँच लाख रुपैयाँ नगरको खातामा नगई मेयर कँडेलको ‘मनमाना पेट्रोल पम्प’मा जम्मा भएको खुलेको हो ।

ठेक्का लिएका ठेकेदार मोहन गिरीले मेयरकै निर्देशनमा दुई पटक दुई लाख र तीन लाख गरी पाँच लाख रुपैयाँ उक्त पेट्रोल पम्पमा जम्मा गरेको स्वीकार गरेका छन् । गिरीका अनुसार तालको ठेक्का उनले पालिका गठन हुनुअघि साविक चौमाला गाविससँग लिएका थिए ।

पालिका गठन भएपछि ठेक्कासम्बन्धी सबै जिम्मेवारी स्थानीय तहमा आए पनि राजस्व नगरको खातामा जम्मा नहुनु गम्भीर अनियमितता हो । राजस्व शाखामा सोध्दा पनि जोगनिया तालको ठेक्का सम्झौता, तिरेको रकम वा बाँकी रहेको विवरण केही फेला परेको छैन । शाखा प्रमुख चित्रराज जोशीले ठेकेदारबाट पैसा लिएको कुनै प्रमाण नभएको स्पष्ट पारेका छन् ।

नगरपालिकाका एक कर्मचारीका अनुसार पुराना कागजातहरू मेयरसँग नजिकका कर्मचारीहरूले नै गायब पारेका छन् । मेयर कँडेलले ठेकेदारसँग मौखिक सहमति गर्दै पाँच लाख रुपैयाँ आफ्नै पम्पमा राखेर बाँकी रकम मिनाहा गर्ने प्रस्ताव गरेका थिए ।

केही समयअघि कार्यपालिकामा यो विषय उठेपछि मेयरले गल्ती स्वीकार गर्दै छिट्टै रकम नगरको खातामा फिर्ता गर्ने प्रतिबद्धता जनाएका थिए । 

समाचार तयार पार्दासम्म भने रकम फिर्ता भएको छैन । गौरीगंगा नगरपालिकामा जोगनिया तालमात्र होइन, भैसवा, वनताल, लोटेहुवा, रारा, त्रिवेणी र चम्रैया ताल समेत ठेक्कामा दिइएका छन् । तर कसले, कहिले, कति रकममा ठेक्का लियो भन्ने कुनै अभिलेख नगरसँग छैन । स्थानीयले मेयरले आन्तरिक मिलेमतोका आधारमा केही ठेकेदारलाई रकम नै नतिरी काम गराएको आरोप लगाएका छन् ।

यस्ता गतिविधिका कारण मेयर कँडेलको आलोचना आफ्नै पार्टीका जनप्रतिनिधिहरूबाट समेत हुन थालेको छ । वडा नं. ९ का अध्यक्ष राजकुमार थारु लगायतका वडाध्यक्षहरूले मेयरले गल्ती नसच्याए कडा कदम चालिने चेतावनी दिएका छन् । स्थानीय नागरिकहरूले समेत निष्पक्ष छानबिन समिति गठन गरी दोषीलाई कारबाही गर्न माग गरेका छन् ।

यसअघि पनि मेयर कँडेलमाथि सरकारी ढुङ्गा–गिट्टी हिनामिनाको आरोप लागेको थियो । उनले आफ्नो जन्मदिनको खर्च पालिकालाई तिराउन दबाब दिने, कार्यालयको सामान आफ्नो घरमा लैजाने, आफ्नै घरमा प्रमुख प्रशासकीय अधिकृतलाई डेरामा राखी दोब्बर भाडा लिने लगायतका आरोपहरू लाग्दै आएका छन् ।

यी सबै अनियमितताहरू नियन्त्रण गर्ने क्रममा प्रमुख प्रशासकीय अधिकृत धर्मानन्द जोशीमाथि समेत आक्रमण भएको थियो । गत साउन १ गते मेयरका ज्वाइँ उमेश जोशीले कार्यकक्षमै जोशीमाथि हातपात गरेका थिए । घाइते जोशी काठमाडौंमा उपचाररत छन् भने
यतिबेला पालिका प्रमुख प्रशासकीय अधिकृतविहीन छ ।

फरार रहेका उमेश जोशी पछि अदालतमा उपस्थित भई ६ हजार रुपैयाँ धरौटीमा रिहा भएका छन् । स्थानीयले यस्ता गतिविधिले नगरको साख गिर्दै गएको भन्दै तत्काल उच्चस्तरीय छानबिन र दोषीमाथि कानूनी कारबाही गर्न माग गरेका छन् ।