एमाले सरकार परिर्वतनको पक्षमा नरहेका

नेकपा (एमाले)का वरिष्ठ उपाध्यक्ष तथा पूर्व उपप्रधानमन्त्री ईश्वर पोखरेलले एमाले अहिले नेपाली कांग्रेससँग गठबन्धन गरेर सरकार परिर्वतन गर्ने पक्षमा नरहेको बताउनुभएको छ ।

मङ्गलबार बिहान प्रेस चौतारी पर्साले वीरगञ्जको होटेल भिस्वामा आयोजना गरेका पत्रकार भेटघाट कार्यक्रममा बोल्नुहुँदै वरिष्ठ उपाध्यक्ष पोखरेलले एमाले उद्देश्य यस अघिको अपवित्र गठबन्धन भत्काउने रहेको र त्यसमा सफल भइसकेकाले नयाँ बनेको समकीरण तोड्ने पक्षमा नरहेको स्पष्ट पार्नुभयो ।

राष्ट्र, राष्ट्रियताका पक्षमा सदा खडा रहने एमालेमा जनताको आस्था र विश्वास रहेको अहिले भर्खरै सम्पन्न उपनिर्वाचनले स्पष्ट पारेको टिप्पणी गर्नुहुँदै उहाँले एमाले अस्तिरताको राजनीतिलाई स्थिर बनाउनेतिर लागि परेको जिकिर गर्नुभयो ।

‘‘जनताको विस्वास जितेर मुलुकलाई सही दिशा दिएर एमाले राष्ट्रकै सही ढङ्गबाट नेतृत्व गर्न चाहन्छौ ।” उहाँले भन्नुभयो, ‘‘उद्योग, उर्जा, कृषि, पर्यटन र पूर्वाधारलाई कसरी विकास गरेर लैजानुपर्छ भन्नेमा राष्ट्रिय स्वतन्त्रता र स्वाधिनताको साथ एमाले अगाडि बढ्ने दाबी गर्नु भयो । 

गोरखापत्र अनलाइन