चन्द्रागिरि केबलकार सञ्चालनमा, खुलेकै पहिलो दिन आज दुई हजार जना पुगे

कोरोना भाइरसका कारण लामो समयदेखि बन्द रहेको चन्द्रागिरिको केबलकार आजदेखि सञ्चालनमा आएको छ । चन्द्रागिरि हिल्सका महाप्रबन्धक अभिषेक विक्रम शाहका अनुसार झण्डै पाँच महिनापछि केबलकार सञ्चालनमा आउँदा आज पहिलो दिन दुई हजार जनाले यात्रा गरेका छन् । उहाँले स्वास्थ्य मापदण्डको पालना गरेर केबलकार सञ्चालन गरिएको बताउनुभयो । 

उहाँले भन्नुभयो, ‘सरकाले तोकेका स्वास्थ्यका मापदण्ड पालना गरेका छौँ, ठाउँ–ठाउँमा स्यानिटाइजरको व्यवस्था छ, मास्कविना प्रवेशमा रोक लगाइएको छ, यहाँ फराकिलो क्षेत्र भएकाले खास भीडभाड नहुने हुनाले पनि कोरोनाको डर कम छ ।’ उहाँले सर्वसाधारणका लागि केबलकार सञ्चालन आजदेखि गरे पनि रिसोर्ट गएको असारबाट नै खुलाइएको जानकारी दिनुभयो । 

यसैगरी आजदेखि चन्द्रागिरिमा जीप लाइन पनि सञ्चालनमा आएको छ । आज त्यहाँ पुगेकामध्ये कतिपयले जीप लाइनको मज्जा पनि लिएका थिए । काठमाण्डौ खाल्डोको एक आकर्षक एकीकृत पर्यटकीय क्षेत्रका रुपमा विकास भएको यस चन्द्रागिरि हिल्समा आजदेखि जीप लाइन पनि थपिएको हो ।