टीकापुरमा प्रचण्डले भने : काङ्ग्रेस,एमालेसँग सहकार्य नगर्ने

कैलाली ।  नेकपा माओवादी केन्द्रका अध्यक्ष पुष्पकमल दाहाल प्रचण्डले नागरिक उन्मुक्ति पार्टीका संरक्षक रेशम  चौधरीलाई जोखिम उठाएर रिहा गरेको बताएका छन् ।

टिकापुर घटनामा मुख्य दोषि ठहर भएर जन्म कैदको सजाय काटिरहेका चौधरीलाई पटक पटक कारागारमा भेटेर मन्त्रिपरिषद्बाट निर्णय गराएर राष्ट्रपतिलाई भनेर छुटाएको उनको भनाइ थियो ।
कैलालीको टिकापुरमा माओवादी केन्द्र निकट थारु राष्ट्रिय मुक्ति मोर्चाको चौथो राष्ट्रिय सम्मेलन उद्घाटन गर्दै प्रचण्डले जोखिम उठाएर रिहा गराएका रेशमबारे आफू अहिले अनविज्ञ रहेको बताएका थिए । उनले रेशमको नेतृत्वबाट धेरै नहुने भन्दै रेशमसहितका सबैलाई माओवादीमा आउँदा उपयुक्त हुने सुझाव दिए  ।
‘मैले जोखिम उठाएर छुटाएको हो रेशम चौधरीलाई । जोखिम उठाएर मैले प्रधानमन्त्रीको हैसियतले क्याबिनेटबाट निर्णय गरेर खोरमा उनलाई पटक पटक भेटेर  राष्ट्रपतिलाई भनेर छुटाएको हो । अहिले रेशम कता छन् मलाई आज भोली त थाहा छैन’ उनले भने,  ‘रेशमबाट धेरै हुन्छ भनेर सोच्नु भएको साथीहरूलाई रेशमलाई पनि लिएर माओवादीमा आउनु भयो भने भलो हुन्छ । ’
अध्यक्ष प्रचण्डले टीकापुर घटनालाई थारु पहिचानका लागि भएको आन्दोलन संज्ञा दिए ।
‘टिकापुर थारु विद्रोह र थारुहरूको पहिचान र अग्राधिकारको लागि भएको आन्दोलन हो त्यसको सम्मान गर्छु’ उनले भने ।
थारु समुदायले जनयुद्धमा गरेको त्याग बलिदानको पनि प्रचण्डले स्मरण गरेका थिए ।
शान्ति प्रक्रियामा आएपछि माओवादीका केही मुद्दा र एजेन्डाहरू कमजोर भएको भन्दै अब जनताको अभियान मार्फत माओवादी फेरी पुरानै अवस्थामा फर्किने विश्वास व्यक्त गरेका थिए । उनले  सुशासनको जग बसाउने प्रयास गरेकै कारण सरकारबाट बाहिरिनु परेको समेत टिप्पणी गरे  ।
‘हामीले एजेन्डा जसरी स्थापना गर्‍यौँ शान्ति प्रक्रियामा आएपछि कमजोर हुँदै गयो ।  मैले सरकारको नेतृत्व गर्दा सुशासन ,सामाजिक न्याय र आर्थिक संवृद्धिको नयाँ अभियान सुरु गरेको थिए । त्यसले जनतामा आसा जगाउँदै गइरहेको थियो ’ प्रचण्डले भने , ‘भ्रष्ट्राचारी र दलालहरू मिलेर यो पटक सरकारबाट बाहिर जानु परेको हो । हामी बाहिर आएपछि जनताको बिचमा तीनै मुद्दासहित अहिले अभियानमा छौँ । ’

उनले  कांग्रेस र एमालेसँग सहकार्य गर्दा माओवादीमा पनि कांग्रेस र एमालेको रोग सरेको भन्दै अब विगतको जस्तो नहुने बताएका थिए । प्रचण्डले आगामी निर्वाचन भन्दा पहिलो सत्तामा नजाने प्रतिबद्धता पनि सुनाए ।
‘कहिले कांग्रेस र कहिले एमालेसँग सहकार्य गर्दा कहिले एमाले कहिले कांग्रेसको रोग सरो । हामीलाई लागेको रोगको उपचारको लागि तपाइहरूसमक्ष आएका छौँ ’ उनले भने , ‘अब विगतमा जस्तो कांग्रेसलाई वा एमालेलाई फकाएर सरकारमा जाने पक्षमा छैनौँ । ०८४ सम्म यो सरकार चाहिएन । जनताको विश्वास जितेर देशको एक नम्बर पार्टी भएर सुशासनको पक्षमा जाने छौँ ।’
कांग्रेस र एमालेले संविधान उल्टाउन खोजेको आरोप लगाउँदै प्रचण्डले भने ‘उत्पीडित वर्गको थप अधिकारको लागि माओवादी आन्दोलनमा एकाकार हुन आवश्यक  ।’  
प्रचण्डले उद्घाटन गरेको थारु राष्ट्रिय मुक्ति मोर्चाको चौथो राष्ट्रिय सम्मेलनमा कञ्चनपुरदेखि झापासम्मका तराइका २४ जिल्लाबाट करिब साढे सात सय जना प्रतिनिधि सहभागी छन् ।उद्घाटन समारोहमा अध्यक्ष प्रचण्डसहितका पदाधिकारीहरूले सम्बोधन गरेका थिए ।