प्रधानमन्त्रीलाई अमर्यादित शब्द प्रयोग गरेको आरोपमा दुई युट्यूवरको संसद पास निलम्बन

काठमाडौं । संसद सचिवालयले संसद भवन बाहिर प्रधानमन्त्री केपी शर्मा ओलीमाथि अमर्यादित शब्द प्रयोग गरेको भन्दै दुई युट्यूवरको प्रवेश पास खिच्न निर्देशन दिएको छ । दुवैको पास एक महिनाका लागि निलम्बन गरिने सचिवालयले जनाएको छ ।

‘युवा मन नेपाल’ नामक युट्यूव च्यानलका किशोरकुमार श्रेष्ठ र ‘सुनौलो नेपाल’ च्यानलका प्रकाश ओली कारवाहीमा परेका हुन् । उनीहरुले अबको एक महिनासम्म संसद भवनमा प्रवेश गर्न पाउने छैनन् ।

गत फागुन ४ गते बसेको प्रतिनिधिसभाको बैठकबाट बाहिरिँदै गर्दा प्रधानमन्त्री ओलीलाई उनीहरुले बाटैमा प्रश्न सोध्न खोजेका थिए ।

एक युट्यूवरको प्रश्न थियो, ‘सामाजिक सञ्जाल विधेयक ल्याएर सरकार तानाशाही प्रवृत्तिमा हिँडेको हो ?’प्रधानमन्त्री ओलीले जवाफमा भनेका थिए, ‘प्रश्न यहाँ होइन, त्यहीँ (बैठकभित्र) गर्ने हो ।’

अर्का युट्यूवरले सोधेका थिए, ‘तानाशाही प्रवृत्ति किन होला प्रधानमन्त्री ज्यू ? जवाफ दिएर त जानुस् ।’युट्यूवरहरूको यस्तो प्रश्नमा एमालेका सांसद सूर्य थापाले संसद बैठकमै आपत्ति जनाएका थिए ।

‘प्रधानमन्त्री प्रश्नोत्तरबाट बाहिरिँदा तपाईँ हिटलर हो ? भनेर सोधियो,’ थापाले भनेका थिए, ‘संसदले बनाएको प्रधानमन्त्री हिटलर हुन्छ सभामुख महोदय ?’

यस विषयमा प्रधानमन्त्रीले समेत चासो राखेपछि संसद सचिवालयले एक्सन लिएको हो । महासचिवस्तरीय निर्णयबाट उनीहरुलाई कारवाही भएको छ ।

सचिवालयले ती दुईजनालाई पठाएको पत्रमा उनीहरूको व्यवहार र शैली संसदीय मर्यादा र अनुशासनविपरीत हुनुका साथै पत्रकारिताको आधारभूत सिद्धान्त उल्लंघन भएको जानकारी गराइएको छ । ‘तानाशाह’ र ‘हिटलर’ जस्ता अमर्यादित शब्दहरू प्रयोग गरेकोमा सचिवालयले आपत्ति जनाएको छ ।

उक्त प्रवेश पास आजै कार्यालय समयभित्र सचिवालयमा बुझाउन आदेश दिइएको छ ।