सडक कार्यालयका हाकिम र ठेकेदारको लापरबाहीले आठ वर्षदेखि पुल अलपत्र

सिन्धुपाल्चोक । खाडीचौर –दोलखा जिरी लाइफलाइन मानिने खाडीचौरस्थित सुनकोसी पक्की पुल आठ वर्षदेखि अलपत्र अवस्थामा रहेको छ । ठेकेदारले पुल निर्माण काम छाडेर बेपत्ता भएपछि लामो समय उक्त मोटरे बल पुल निर्माण हुन सकेको छैन ।

निर्माण कम्पनी र सरकारबिच २०७५ सालमा सम्पन्न गर्ने गरी २०७३ साल भदौ ६ गते सम्झौता भएको थियो । ३५ मिटर लामो सो पुल नौ करोड ५६ लाख ८८ हजार ३ सय बजेटमा निलगिरी नेशनल जेभी काठमाडौँले पुल निर्माण सम्पन्न गर्ने ठेक्का पाएको थियो । तर ठेकेदार पक्षले बलेफी गाउँपालिका–७ खाडीचौर पट्टीको भागमा एक वटा पुलको जीप निर्माण गरेर त्यसपछि फरार छ ।

हालसम्म उक्त पुल १५ प्रतिशत मात्रै काम सकिएको छ । मुआब्जा लगायतका बहाना देखाउँदै काम गर्न आलटाल गरेर बेपत्ता भएको सो निर्माण कम्पनी अहिले पुलसँग सम्बन्धित पक्षसँग सम्पर्क बाहिर छ । सडक डिभिजन कार्यालय, गाउँपालिका लगायतले ठेकेदार पक्षलाई खोजेर पुल निर्माण सम्पन्न गर्नु पर्ने बताएपछि ठेकेदार पक्ष फरार छ । सडक डिभिजन कार्यालय चरिकोटका प्रमुख अमित श्रेष्ठले उक्त पुल निर्माण गर्न ठेकेदार पक्षलाई पटक–पटक निर्देशन दिएको जानकारी दिनुभयो । सडक कार्यालयका हाकिम नै ठेकेदारको प्रलोभनमा परेर वर्षसम्म पुल अलपत्र बनाएको र स्थानीयले सास्ती खेप्नुपरेको आरोप स्थानीयवासीको छ । नियामक निकायको कमजोरी छ तत्काल काम सुरु गर्न माग गरेका छन् । 

पुलको दायाँ संरचनाको मुआब्जा निर्धारण भए पनि बजेट अभावले मुआब्जा दिन नसकिएकोले पुलको काम रोकिएको जनाइएको छ । पुलको जग निर्माणका क्रममा एक मजदुरको च्यापिएर ज्यान गएपछि पुल निर्माण ठेकेदार पक्ष झनै प्रभावित बनेको स्थानीय जयराम सुवेदीले बताउनुभयो । सुवेदी जस्ता दर्जनौँ जग्गावालाले तत्काल उचित मुआब्जा दिई पुल निर्माण गर्न सरकारसँग आग्रह गरेका छन् ।