कार्य सम्पादनमा लम्की चुहा नगरपालिका उत्कृष्ट

लम्की  । शहरी विकास मन्त्रालय अन्तरगत नेपाल शहरी शासकीय तथा पूर्वाधार आयोजनाबाट विनियोजन गरिएको बजेट कार्य सम्पादन मुल्यांकनमा कैलालीको लम्की चुहा नगरपालिका देशभरिकै उत्कृष्ट बन्न पुगेको छ । मन्त्रालयले विनियोजन  गरेको रकमले नगरपालिकाका विभिन्न विकास निर्माणका कामहरु समयमा सम्पन्न गरेकोले आयोजनाले पुरस्कृत गरेको लम्की चुहा नगरपालिका नगरप्रमुख शुशिला शाहीले बताउनुभयो ।

आयोजनाले विनियोजन गरेको रकमबाट लम्की चुहा नगरपालिकाको विकासमा टेवा पुगेको नगर प्रमुख शाहीले बताउनुभयो । जनशक्तिको अभावका बावजुद पनि कार्यसम्पादनमा देशकै पहिलो बन्न पुगेकोमा नगरवासीले खुशी ब्यक्त गरेकाछन् । सामुहिक प्रतिबद्धता,पारदर्शीता र उत्तरदायित्वको प्रतिफल देशकै पहिलो नगरपालिका बन्न पुगेको नगर उप प्रमुख जुना चौधरीले बताउनुभयो । उक्त नगरपालिकाको नेतृत्व नगर प्रमुख ,उप प्रमुख र कार्यालय प्रमुख महिलाले गर्नुभएको छ । महिलाहरुले जिम्मेवारी पाएमा कार्यसम्पादन सफलतापूर्वक गर्न सक्छन भन्ने उधारण लम्की चुहा नगरपालिकाले दिएको छ ।