युवा जनशक्तिलाई सिप र रोजगारीमा जोड्न आवश्यक : मुख्यमन्त्री शाह

कैलाली । सुदूरपश्चिम प्रदेशका मुख्यमन्त्री कमलबहादुर शाहले युवाशक्तिलाई परिवर्तनसँग जोड्दै रोजगारी सिर्जना गर्नुपर्नेमा जोड दिएका छन् ।

मङ्गलबार कैलालीको बर्दगोरिया गाउँपालिका–१, बौनियामा अन्तर्राष्ट्रिय युवा दिवस–२०२५ का अवसरमा मुख्यमन्त्री शाहले सो कुरा बताएका हुन्  । नेपाली जनताको हक अधिकार स्थापित गर्ने आन्दोलनको नेतृत्व युवावर्गले नै गरेको चर्चा गर्दै उनले युवालाई रूपान्तरणको सद्भाव र परिवर्तनको संवाहक भएको संज्ञा दिएका छन् ।

मुख्यमन्त्री शाहले युवावर्गलाई प्रदेशमै रोजगारी दिनका निम्ति प्रदेश सरकारले युवा जनशक्तिलाई नवप्रवर्तन, स्टार्टअपका साथै सिप रोजगारी कार्यक्रम ल्याएको चर्चा गरे । 

साथै उनले युवावर्गलाई लागुऔषध दुव्र्यसन रोकथामका लागि विभिन्न किसिमका जनचेतनामूलक कार्यक्रम प्रदेश सरकारले सञ्चालन गरेको बताए । अन्तर्राष्ट्रिय युवा दिवस–२०२५ को उपलक्ष्यमा प्रदेश युवा परिषद्ले आयोजना गरेको सो कार्यक्रममा सामाजिक विकासमन्त्री मेघराज खड्का, राज्यमन्त्री सरस्वती खड्का, नेकपा ९एमाले० का नेता नारदमुनि राना, कमलावली, गौरीशङ्कर चौधरी, नेपाली कांग्रेसका नेता नृप सुनार, बर्दगोरिया गाउँपालिकाका अध्यक्ष कर्णबहादुर कुँवरलगायतले मन्तव्य राखेका थिए ।

कार्यक्रममा मुख्यमन्त्री शाहले टीकापुरका अरुण लोहारलाई एक लाख रुपियाँ आर्थिक सहयोगसमेत प्रदेश सरकारले गर्ने बताए । लोहारले देशका विभिन्न स्थानमा निःशुल्क खगोल विज्ञानसम्बन्धी क्रियाकलाप गर्दै आएका छन्।

कार्यक्रम सुदूरपश्चिम प्रदेश युवा परिषद् कार्यकारी उपाध्यक्ष गजेन्द्र साउदको अध्यक्षतामा भएको हो । दिवसका अवसरमा कार्यकारी उपाध्यक्ष साउदले युवा वर्तमानको साक्षी र भविष्यको मेरुदण्ड भएको उल्लेख गर्दै राष्ट्रनिर्माण, आर्थिक विकास र समृद्धिका लागि सबै युवा एकजुट भएर लाग्नुपर्ने बताए ।