जेनजी आन्दोलनका क्रममा कैलालीमा १०८ सरकारी कार्यालय भवन र ६०० सवारी साधन ध्वस्त

धनगढी । भदौ २४  मा भएको जेनजी आन्दोलनका क्रममा कैलालीमा अधिकाँस सरकारी संरचनाहरु ध्वस्त पारिएका छन् ।सुदुरपश्चिम प्रदेशको अस्थायी राजधानी धनगढीमा रहेका अधिकाँस सरकारी कार्यालयमा प्रदर्शनकारीले आगजनी र तोडफोड गरेका थिए । धनगढीमा रहेका सरकारी कार्यालय नेपाल टेलिकम, विद्युत, स्वास्थ्य कार्यालय, सेती प्रादेशिक अस्पताल, धनगढी उपमहानगरपालिका र नेपाल प्रहरीको बाहेक प्रायजसो सबै सरकारी कार्यालयका भवनमा आगजनी गरिएको छ भने सवारी साधन समेत जलाइएका छन् । कैलालीका अत्तरिया, घोडाघोडी, लम्कीचुहा, टीकापुर लगायतका ठाउँमा रहेका सरकारी संरचनामा समेत क्षति पुगेको जिल्ला प्रसाशन कार्यालय कैलालीले जनाएको छ  ।

कैलाली जिल्लाभर एक सय आठ सरकारी कार्यालय भवनमा आगजनी, तोडफोड र लुटपाट गरिएको छ भने दुई र चार पाङ्ग्रे गरेर छ सय वटा सवारीसाधन समेत जलाइएको जिल्ला प्रशासन कार्यालयले गरेको प्रारम्भिक रिपोटमा उल्लेख गरेको छ ।
१०८ सरकारी कार्यालय भवन, १०० वटा चार पाङ्ग्रे गाडी र ५०० जति मोटरसाइकल आगजनीले नष्ट भएको पाइएको जिल्ला प्रशासन कार्यालयका प्रशासकीय अधिकृत शिवराज जोशीले प्रारम्भिक अनुमान रहेको छ । प्रारम्भिक विवरण हेर्दा जेनजी आन्दोलनका दिन जिल्लामा सरकारी संचरनामा ठूलो क्षति भएको बताउदै जोशीले तथ्यांक तलमाथि हुनसक्ने बताए ।

उनकाअनुसार ८÷९ पार्टी कार्यालय र नेताका निजी घर समेत जलाइएका छन् । क्षतिको विवरण संकलन गर्ने काम भइरहेको छ ।
प्रदर्शनकारीले जिल्ला प्रशासन कार्यालयमा समेत आगजनी गरेपछि सेवा प्रवाह ठप्प भएको छ । शनिबार सरसफाइ गरेको प्रशासनले आइतबारदेखि टेन्ट गाडेरै भएपनि अत्यावश्यक सेवा प्रदान गर्ने तयारी गरेको छ ।

आगजनीपछि कैलाली जिल्ला अदालत, मालपोत, नापी कार्यालय र प्रदेश सरकार अन्तरगतका प्राय सबै निकायको कामकाज रोकिएका छन् । अवस्था समान्य बन्दै जान थालेपछि यी कार्यालयहरुले समेत सेवा प्रवाहका लागि वैकल्पिक उपायको खोजी गर्न थालेका छन् ।