शुक्रबार १७, माघ २०८२ २२:१८
| January 30, 2026
कैलाली । गत मंगलबार कैलालीको लम्कीमा ‘राजकीय सवारी’ को शैलीमा एकसाथ थुप्रै गाडीहरू हुइँकिएर आए । प्रतिनिधिसभा सदस्यमा उठेका एक बहुचर्चित उम्मेदवारलाई प्रहरीले अगुवा र पछुवा गाडीसहित स्कर्टिङ गरेर ल्याइरहेको थियो ।
उनी थिए काठमाडौं महानगरपालिकाका पूर्वमेयर तथा राष्ट्रिय स्वतन्त्र पार्टीका वरिष्ठ नेता बालेन साह । बालेनको पर्खाइमा लम्कीबजारमा बाक्लै भिड जम्मा भइसकेको थियो । भिडले बालेनको गाडीलाई रोक्यो । बालेन-बालेन भन्दै नारा लाग्न थाल्यो ।
कैलाली-२ मा उठेका रास्वपाका बालेननिकट उम्मेदवार केपी खनाल भिडको अग्रपंतिमा थिए । उनी नजिकै आएपछि ड्राइभर छेउको सीटमा बसेका बालेनले गाडीको झ्याल उघारे । खनाललाई केही ईशारा गरे । अन्य समर्थक र सञ्चारकर्मीहरूसँग बोल्न भने रुचि देखाएनन् । खनालले समर्थकहरूलाई घण्टीघर (रास्वपा कार्यालय) मा जम्मा हुन भने । प्रहरीले भिड हटायो र बालेनको गाडी अघि बढ्यो ।
एक सञ्चारकर्मीले बालेनलाई ‘यहाँ आउँदा कस्तो लाग्यो ?’ भनेर सोधेका थिए । बालेनले केही नबोली राम्रो लागेको संकेतस्वरूप बुढी औंला देखाए ।
केही सेकेन्डमात्रै रोकिएर बालेनको गाडी हुइँकियो । तर, त्यसपछि अनौठो दृष्य देखियो ।
बालेन चढेको गाडीभन्दा ३-४ वटा गाडीपछाडि एउटा कारको रुफटपबाट आधा जिउ निकालेर बालेनजस्तै अर्का व्यक्ति देखा परे । उनी एउटा हातले घन्टी बजाउँदै समर्थहरूलाई हात हल्लाइरहेका थिए । अनुहारमा दारी, कालो टोपी र पहिरनले उनी बालेन होइनन् भनेर कसैले भन्न सक्दैनथे । भर्खर बालेनको गाडि अगाडि लागेको देखेका समर्थकहरू अर्का ‘बालेन’ हात हल्लाउँदै आएपछि अल्मलिए । यो दृष्य भिडिओमा समेत कैद भएको छ र अहिले सामाजिक सञ्जालमा भाइरल भइरहेको छ ।
आखिर उनी को थिए त ? बालेनले नै उनलाई लगेका हुन् कि उनी आफूखुशी बालेनको पछि लागेका हुन् । यी जिज्ञासाहरू जनमानसमा छन् ।
बालेनको जस्तै भेषमा हिँडेका यी युवा हुन् कैलाली टीकापुरकै गोपाल कोइराला । उनको टीकापुरमा फेन्सी पसल छ । उनी आफूलाई बालेनको फ्यान भन्ने गर्छन् । बालेनकै जस्तो दारी-कपाल बनाएका छन् । बालेन रास्वपामा आएपछि आफूले पनि सदस्यता लिएको उनले बताए ।
नेपाल प्रेससँग कोइरालाले भने, ‘म पहिलेबाटै उहाँको फ्यान हो । त्यो दिन बालेनलाई प्रभावित पार्न उहाँकै हुलियामा हिँडेको हुँ । तर सबैले मलाई नै बालेन ठान्नु भएछ ।’
बालेनले आफूलाई परिचालित नगरेको उनले दाबी गरे । आफ्नै इच्छामा केही गाडी रिजर्भ गरेर त्यहाँ गएको पनि उनको दाबी छ । तर, बालेनलाई भेट्न भने नपाएको कोइरालाले बताए ।
‘म पहिले पनि बालेनको गेटअपमा हिँड्ने गर्थेँ । त्यो दिन मैले गाडी माथिबाट सामान्य ढङ्गले हात हल्लाएको हो । कुनै योजनाबद्ध थिएन,’ उनले भने ।
रास्वपाले भने अहिलेसम्म यस विषयमा कुनै जवाफ दिएको छैन । प्रदेश सभापति प्रकाश विष्टलाई नक्कली बालेनबारे प्रश्न गर्दा कुनै जानकारी नभएको बताए । उनी बालेनसँगै भ्रमणमा छन् ।
रास्वपाका एक स्थानीय नेताले भने नाम नखोल्ने शर्तमा बालेनले नै डुब्लिकेट लिएर हिँडेको आशंका व्यक्त गरे ।
उनले नेपाल प्रेससँग भने, ‘बालेनको जानकारीबिना उहाँको पछिपछि उहाँकै भेषमा गाडीबाट हात हल्लाउँदै हिँड्ने हिम्मत कसैले गर्दैन । जबकि प्रहरीको गाडी पनि सँगसँगै थियो । थाहा नपाउने कुरै हुँदैन ।’
प्रहरीले भने यस विषयमा समाचारमा आएपछि मात्र थाहा पाएको बताएको छ । स्कर्टिङको कमाण्ड लिएका इलाका प्रहरी कार्यालय लम्कीका प्रमुख प्रहरी निरीक्षक कविराज रोकायाले आफूहरू बालेनको सुरक्षामा केन्द्रित रहेकाले पछिपछि आएका व्यक्तिबारे ध्यान नदिएको बताए ।
उनले भने, ‘हाम्रो गाडी अगाडि थियो । रुट क्लीयर गर्नेमा मात्रै केन्द्रित भयौँ । पछि बालेनजस्तै अर्को मान्छे आएको भन्ने सुनिएको छ । यो विषयमा के कसो हो भनेर बुझ्ने कुरा भएको छ । जिल्ला प्रहरीले के भन्छ त्यही गर्ने हो ।’
कतिपयले बालेनलाई प्रहरीले दिइएको अगूवा पछुवाको सुविधाको विषयमा पनि प्रश्न उठाएका छन् । सामान्यतया प्रहरीले यस्तो अगूवा पछुवा सुविधा उच्च राजकीय पदमा रहेकाहरूलाई मात्र उपलब्ध गराउँछ । बालेन अहिले कुनै पनि सरकारी ओहदामा छैनन् । उनी चुनावी उम्मेदवार मात्र हुन् ।
कैलालीका प्रमुख जिल्ला अधिकारी हीरालाल रेग्मी सुरक्षा संवेदनशीलतालाई हेरेर प्रहरीले स्कर्टिङ गरेको बताए ।
उनले नेपाल प्रेससँग भने, ‘उहाँलाई प्रोटोकलका आधारमा नभएर भिडबाट जोगाउन कडा सुरक्षा दिइएको हो ।’
बालेन गत मंगलबारदेखि सुदूरपश्चिम प्रदेशको भ्रमणमा छन् । झापा ५ बाट उम्मेदवार बनेका उनी सुदूरपूर्वको भ्रमणपछि सुदूरपश्चिम मोडिएका हुन् ।
सुदूरपश्चिमका ९ जिल्ला उनले तीन दिनमा भ्याए । यहाँका १६ निर्वाचन क्षेत्रमै १५ निर्वाचन क्षेत्र हिजै भ्याइसकेका थिए । कैलाली र कञ्चनपुरमा ८ निर्वाचन क्षेत्र छन् । बालेनले एकै दिन सबै क्षेत्रमा पुगेर ती क्षेत्रका उम्मेदवारहरूसँगै घण्टी बजाए । बुधबार १० नबज्दै उनी डडेल्धुराको तुफान डाँडा पुगेका थिए ।
जिल्लाको पार्टी कार्यालयमा कार्यकर्ता र शुभेच्छुकसँग भेटघाट गरेर उनी बैतडीको पाटनमा रहेको पार्टी सम्पर्क कार्यालयमा पुगे । बैतडी सकेर दार्चुलाको गोकुलेमा रहेको पार्टी कार्यालयमा पुगेका उनी बिहीबारको राती बझाङ गए । पहिलो दिन दुई जिल्लाको ८ निर्वाचन क्षेत्रमा पुगेका बालेन दोस्रो दिन ४ जिल्लाका ४ निर्वाचन क्षेत्रमा पुगे ।
बिहीबार बिहानै बझाङ चैनपुर बजारमा पुगेर दिउसो बाजुराको मार्तडी गए । मार्तडीबाट फर्किएर अछामको साँफेबगर आए । केहीबेर त्यहाँ अडिएर घण्टी बजाएपछि डोटीतर्फ लागे ।
आज उनी आफ्ना स्वकीय सचिव भूपदेव शाह उम्मेदवार रहेको अछाम-२ को मङ्गलसेन लगायतका तीन क्षेत्रमा बालेन पुग्ने कार्यक्रम रहेको प्रदेश सभापति प्रकाश विष्टले जानकारी दिए ।
‘आज मङ्गलसेन, कमलबजार विनायक हुँदै कर्णाली जाने कार्यक्रम छ,’ उनले भने, ‘हिजोसम्म हामी सुदूरपश्चिमका सबै जिल्ला पुगिसकेका छौँ ।’
बालेन तीन दिनमा सबै जिल्लामा पुगे पनि त्यहाँ उनले कतै पनि भाषण गरेनन् । दोहोरो संवाद नगरी र छोटो समयमै स्थान परिवर्तन गर्दै सुदूरपश्चिम घुमेका बालेन आज कर्णाली लाग्ने छन् । प्रत्येक निर्वाचन क्षेत्रमा उनले औसतमा १५ मिनेट समय दिएका थिए । केही क्षेत्रमा त उनी त्यति पनि रोकिएनन् । केही क्षेत्रमा रोकिने कार्यक्रम हुँदा पनि गाडीमै हुइँकिए ।
सुदूरपश्चिम प्रदेश प्रवेशको पहिलो दिन नै केपी खनालको निर्वाचन क्षेत्र रहेको बर्दगोरियाको बौनियामा स्वागत तथा अभिनन्दन कार्यक्रम रहेको थियो। तर, बालेन त्यहाँ रोकिएनन् । त्यहाँ बालेनलाई हेर्न पुगेकाहरू निराश भएर फर्किएका थिए । अन्य केही क्षेत्रमा पनि यस्तै भएको थियो ।
बालेन रोकिएको ठाउँमा पनि कुनै चुनावी कार्यक्रम भएन । बालेन वा उम्मेदवारले सम्बोधन गरेनन् । एजेन्डा भनेनन् । कार्यालय अवलोकन गर्ने, उम्मेदवारसँगै घण्टी बजाउने र कार्यकर्ताहरूलाई हात हल्लाउने बालेनको शैली छ । कतिपय कार्यकर्ता अनुहारमात्र देखाउन आएको भन्दै रुष्ट बनेका छन् ।
रास्वपाले भावी प्रधानमन्त्रीको लागि अघि सारेको व्यक्तिले चुनावी प्रचारमा आउँदा पनि किन एक शब्द बोलेनन् ? प्रदेश सभा विष्ट आचारसंहिताको कारणले कुनै चुनावी कार्यक्रम नगरिएको दाबी गर्छन् ।
‘अहिले आचारसंहिता लागू छ । ठूला कार्यक्रम, चुनावी र्याली र तडकभडक गर्न पाइँदैन । त्यसैले उहाँ (बालेन) ले सम्बोधन नगर्नुभएको हो,’ उनले भने, ‘यसपटक उम्मेदवारलाई भेट्ने र हौसला दिने गरी उहाँ सुदूरपश्चिम आउनुभएको हो ।’
बालेनले ९ जिल्ला भ्रमण गर्दा चुनावी भाषण नगरे पनि दुई स्टाटसबाट सुदूरपश्चिमलाई सम्बोधन गरेका थिए ।
पूर्वप्रधानमन्त्री शेरबहादुर देउवाको गृहजिल्ला डडेल्धुरा पुगेर उनले ‘सुदूर अब दूर नाइँ, झिक्कै झिक्कै माया तम्लाई’ भनेर फेसबुकमा स्टाटस लेखे । बझाङबाट बाजुरा यात्रा गर्ने क्रममा बिहीबार अर्को स्टाटस लेखे, ‘बझाङबाटी बाजुरा जान लाग्या छु, बडिमालिका माताले सबैकी आशिष् दिऊन् ।’ nepalpress बाट साभार
प्रतिकृया दिनुहोस